Rriqrat dhe insektet që bartin sëmundje po përhapen në zona të reja, duke shkaktuar shqetësim te ekspertët shëndetësorë në SHBA.

Sipas të dhënave të autoriteteve amerikane, rastet e sëmundjeve të transmetuara nga insektet janë rritur ndjeshëm gjatë viteve të fundit. Rriqrat mund të bartin sëmundje si Lyme, babesioza dhe anaplazmoza, ndërsa disa lloje mund të shkaktojnë edhe alergji ndaj mishit të kuq.

Një nga rastet më të veçanta është sindroma alfa-gal, një alergji që mund të shkaktohet nga pickimi i një lloji rriqre dhe që mund t’i bëjë njerëzit të kenë reagime ndaj produkteve të mishit të kuq dhe disa produkteve shtazore.

Ekspertët thonë se ndryshimet klimatike, rritja e temperaturave, ndryshimet në përdorimin e tokës dhe shtimi i disa kafshëve bartëse, si drerët, po ndihmojnë në përhapjen e këtyre insekteve.

Për mbrojtje, rekomandohet përdorimi i preparateve kundër insekteve, kontrolli i trupit pas qëndrimit në natyrë, shmangia e ujërave të ndenjura dhe mbajtja e hapësirave përreth shtëpisë të pastra.