Britney Spears është rikthyer në qendër të vëmendjes pas një incidenti në Los Angeles, ku u filmua duke dalë përmes tavanit panoramik të automjetit me të cilin po udhëtonte.

Pamjet u përhapën me shpejtësi në rrjetet sociale, duke nxitur reagime të shumta. Pas tyre, ish-menaxheri i këngëtares, Sam Lutfi, u bëri thirrje njerëzve të tregojnë më shumë mirëkuptim dhe të shmangin gjykimet e nxituara.

“Ajo është një qenie njerëzore para se të jetë një personazh i famshëm. Njerëzit gjykojnë shumë shpejt, veçanërisht kur bëhet fjalë për Britney”, deklaroi Lutfi për Daily Mail.

Ai theksoi se rrjetet sociale nuk mund të shërbejnë si bazë për të nxjerrë përfundime mbi gjendjen e dikujt, duke shtuar se nuk dëshiron të spekulojë apo ta gjykojë këngëtaren bazuar vetëm në disa sekonda video.

Edhe vetë Spears reagoi përmes një postimi në Instagram, duke lënë të kuptohet se videot e publikuara nuk pasqyrojnë realitetin e jetës së saj.

“Njerëzit shohin vetëm dy sekonda të asaj që bëj, por jo ditët dhe orët e jetës sime. Asgjë nuk është ashtu siç duket”, shkroi ajo, duke shtuar me ironi se ndoshta duhet të dalë edhe më shpesh nga tavani i makinës.

Në fund të reagimit të tij, Lutfi, marrëdhënia e të cilit me Spears ka qenë shpesh objekt polemikash ndër vite, uroi që këngëtarja të trajtohet me më shumë respekt dhe dhembshuri, duke theksuar se ajo meriton të njëjtin mirëkuptim si çdo njeri tjetër.