Charles Leclerc i ka dhënë fund pritjes për fitoren e parë të sezonit në Formula 1, duke triumfuar në Çmimin e Madh të Britanisë me Ferrarin dhe duke heshtur kritikët që kishin vënë në dyshim formën e tij. Piloti nga Monako përfitoi nga një problem teknik i Mercedesit të Andrea Kimi Antonellit në xhirot e fundit për të siguruar suksesin e parë që nga gara e SHBA-së në vitin 2024, pasi më herët kishte mposhtur edhe shokun e skuadrës, Lewis Hamilton, në kualifikime.

Pas garës, Leclerc pranoi se kishte përjetuar një periudhë të vështirë për shkak të kritikave, por theksoi se nuk e humbi kurrë besimin te vetja. “Kohët e këqija nuk zgjasin përgjithmonë. U krijuan shumë narrativa dhe kishte shumë negativitet, por vazhdova të punoja fort me ekipin. Në këtë sport kalon nga hero në fajtor brenda pak ditësh, por e di që nuk u bëra pilot i keq brenda natës”, deklaroi ai, duke falënderuar Ferrarin për mbështetjen që i ka dhënë gjatë gjithë sezonit.