Gjiganti teknologjik Apple ka njoftuar një marrëveshje masive prej 30 miliardë dollarësh me kompaninë Broadcom për të dizajnuar dhe prodhuar çipa brenda Shteteve të Bashkuara. Ky hap është pjesë e përpjekjeve të vazhdueshme të Apple për të diversifikuar zinxhirin e saj të furnizimit dhe për të mbështetur prodhimin vendas – një objektiv ky që ndahet edhe nga Presidenti Donald Trump.

Broadcom do të prodhojë çipa për lidhje pa tel (Wi-Fi, rrjete celulare dhe Bluetooth). Edhe pse këta nuk janë çipat e memories dhe hapësirës (të cilët janë shtrenjtuar jashtëzakonisht shumë për shkak të hovit të Inteligjencës Artificiale), tarifat e larta doganore i kanë kushtuar Apple-it miliarda dollarë në tremujor. Kjo e ka shtyrë kompaninë që të kthejë një pjesë të prodhimit në SHBA për të shmangur kostot dhe për të pakësuar varësinë nga prodhuesit në Tajvan.

Marrëveshja e re do të mundësojë prodhimin e 15 milionë çipave në SHBA. Gjithashtu, Broadcom do të investojë 1.5 miliardë dollarë për të zgjeruar dhe modernizuar fabrikat e saj në Kolorado. Kjo pason një tjetër marrëveshje prej 9 miliardë dollarësh të njoftuar nga Trump muajin e kaluar mes Apple dhe Intel.

Drejtori ekzekutiv i Apple, Tim Cook, deklaroi se ky partneritet përshpejton përkushtimin e kompanisë ndaj inovacionit amerikan, duke paralajmëruar gjithashtu se rritja e çmimeve të pajisjeve globale ka qenë "e paevitueshme" kohëve të fundit për shkak të kostove të larta të komponentëve të IA-së.