Shkencëtarët e psikologjisë thonë se momentet si fillimi i vitit, një ditë e hënë apo edhe një ditëlindje mund të shërbejnë si “fillime të reja”, duke na bërë më të motivuar për të ndryshuar sjelljet dhe për të arritur objektivat tona.

Sipas ekspertëve, ky efekt i quajtur “fresh-start effect” mund të shfrytëzohet në çdo kohë të vitit, jo vetëm në fillim të vitit të ri.

Hulumtimet tregojnë se shumë njerëz nuk i arrijnë plotësisht rezolutat e tyre, por një pjesë e konsiderueshme vazhdon të mbajë të paktën disa prej tyre nëse vendos qëllime reale dhe të matshme.

Ekspertët theksojnë se çelësi i suksesit është krijimi i zakoneve të qëndrueshme, përsëritja e tyre dhe zëvendësimi i zakoneve të këqija me ato më të shëndetshme.

Po ashtu, motivimi rritet kur procesi i arritjes së qëllimit bëhet i këndshëm, si për shembull ushtrimi me një mik apo kombinimi i aktiviteteve të vështira me diçka që na pëlqen.

Sipas psikologëve, rënia e motivimit në mes të rrugës është normale, prandaj rekomandohet ndarja e qëllimeve në hapa të vegjël dhe ndjekja e progresit, në vend të fokusimit vetëm te rezultati final.