Sistemi aplikohet për udhëtime afatshkurtra deri në 90 ditë brenda një periudhe 180-ditore dhe synon të modernizojë dhe forcojë kontrollin kufitar në zonën Shengen.

Në hyrjen e parë pas aktivizimit të sistemit, udhëtarëve do t’u regjistrohen të dhënat e pasaportës, fotografia dhe gjurmët e gishtërinjve. Autoritetet theksojnë se refuzimi për të dhënë të dhënat biometrike sjell refuzim të hyrjes në territorin Shengen.

Në fazën fillestare të zbatimit mund të ketë vonesa në pikat kufitare, ndaj qytetarët këshillohen të planifikojnë udhëtimet me kohë shtesë dhe të sigurohen që dokumentet e tyre të jenë të vlefshme dhe në gjendje të rregullt.

Sistemi nuk ndryshon rregullin ekzistues të qëndrimit maksimal 90/180 ditë dhe nuk kërkon aplikim paraprak, pasi regjistrimi bëhet në momentin e kalimit kufitar.