Presidenti amerikan Donald Trump ka reaguar ashpër ndaj performancës së Bad Bunny në Super Bowl Halftime Show, duke e cilësuar atë si “një shuplakë në fytyrë” dhe duke deklaruar se performanca nuk përfaqëson standardet amerikane të suksesit dhe kreativitetit.

Në një postim në rrjetin Truth Social, Trump u shpreh se askush nuk e kupton gjuhën e përdorur nga reperi portorikan dhe kritikoi koreografinë e shfaqjes, duke e quajtur të papërshtatshme për fëmijët. Trump nuk ishte i pranishëm në Super Bowl, por e ndoqi ndeshjen nga Florida.

Bad Bunny, një nga artistët më të dëgjuar në botë, u ngjit në skenë me hitet e tij më të njohura, duke sjellë imazhe të fuqishme dhe mesazhe bashkuese. Gjatë performancës, ai theksoi se shprehja “God bless America” përfshin të gjitha vendet e Amerikës, nga Amerika Veriore deri në atë Jugore, duke shfaqur edhe flamujt e shumë shteteve, përfshirë atë të SHBA-së dhe Porto Rikos.

Kritikat e Trumpit nuk janë të papritura, pasi ai kishte shprehur kundërshtime ndaj zgjedhjes së Bad Bunny për halftime show edhe më herët. Megjithatë, performanca u prit pozitivisht nga fansat dhe u vlerësua gjerësisht në rrjetet sociale për artin dhe mesazhin që përcolli.