Organizata Botërore e Shëndetësisë (OBSH) ka klasifikuar mishrat e përpunuar në Grupin 1, si kancerogjene për njerëzit, bazuar në prova të mjaftueshme shkencore. Sipas OBSH-së, lidhja më e fortë është vërejtur me kancerin kolorektal.

Në këtë kategori përfshihen produkte të përpunuara përmes kriposjes, fermentimit, tymosjes ose proceseve të tjera për ruajtje dhe shije, si proshuta e gatuar dhe e gjallë, sallamet, salçiçet dhe mishi i konservuar.

Studimet tregojnë se konsumimi i përditshëm i rreth 50 gramëve mish të përpunuar shoqërohet me një rritje relative prej rreth 18% të rrezikut për kancer kolorektal. Edhe pse rreziku për individin konsiderohet i moderuar, në nivel popullate kjo paraqet një shqetësim të rëndësishëm të shëndetit publik.

OBSH thekson se ky klasifikim nuk lidhet me një produkt apo markë të caktuar, por me teknologjinë ushqimore të përdorur në përpunimin e mishit.