Një organizatë për të drejtat e punëtorëve ka ngritur shqetësime serioze për kushtet e punës në një fabrikë kineze që prodhon lodrat e njohura Labubu.

Sipas raportit të China Labor Watch, një furnizues i kompanisë Pop Mart dyshohet se ka detyruar punëtorët të punojnë orë të tepërta, të nënshkruajnë kontrata të paplota dhe nuk u ka ofruar pushime të paguara apo trajnim të mjaftueshëm për sigurinë në punë. Hetimi është bazuar në 51 intervista me punonjës të fabrikës Shunjia Toys Co Ltd në provincën Guangdong.

Pop Mart ka konfirmuar se po i shqyrton pretendimet dhe ka deklaruar se do të kërkojë korrigjimin e menjëhershëm të praktikave nëse shkeljet vërtetohen. Kompania thekson se kryen auditime të rregullta, përfshirë edhe kontrolle nga palë të treta ndërkombëtare.

Raporti nuk ka gjetur raste të punës së fëmijëve, por thekson se janë punësuar të mitur 16-vjeçarë pa mbrojtjen e veçantë që parashikon ligji. China Labor Watch i ka bërë thirrje Pop Mart të marrë masa urgjente dhe të sigurojë respektimin e standardeve ligjore dhe ndërkombëtare të punës.