Presidenti i Shteteve të Bashkuara, Donald Trump, ka njoftuar se çdo shtet që mban marrëdhënie tregtare me Iranin do t’i nënshtrohet një tarife të re prej 25 për qind për biznesin që zhvillon me SHBA-në. Vendimi, sipas tij, hyn në fuqi menjëherë.

Shtëpia e Bardhë nuk ka dhënë detaje shtesë mbi mënyrën e zbatimit të tarifës, ndërsa nuk është sqaruar as se cilat aktivitete konsiderohen si “të bërit biznes” me Iranin. Vendimi ka ngritur pikëpyetje mbi shtetet që do të preken dhe nëse tarifat do të aplikohen vetëm për mallra apo edhe për shërbime.

Masa pritet të ketë ndikim të madh mbi Kinën, një nga partnerët kryesorë tregtarë të Iranit. Si pasojë, tarifat për mallrat kineze që importohen në SHBA mund të rriten ndjeshëm. Kina ka reaguar duke kundërshtuar vendimin, duke theksuar se sanksionet e njëanshme dhe luftërat tregtare nuk sjellin zgjidhje.

Në këtë kontekst, ekspertët paralajmërojnë se vendimi i Trumpit mund të thellojë tensionet tregtare globale dhe të ketë pasoja të reja për ekonominë ndërkombëtare.