Tilly Norwood, aktorja e parë e krijuar nga inteligjenca artificiale, ka ngjallur reagime të forta në industrinë e filmit. Personazhi virtual u prezantua në Festivalin e Filmit në Zyrih në shtator 2025 dhe është krijuar nga kompania britanike Particle6, e drejtuar nga Eline Van der Velder.

Sipas krijuesve, Tilly është menduar me kujdes për pamjen, personalitetin dhe rolin e saj, ndërsa tashmë po ndërtohet një “univers” i quajtur Tillyverse rreth saj. Video të saj janë publikuar në rrjete sociale, duke e paraqitur në reklama të rreme për filma fantastikë, horror dhe aksion.

Megjithatë, komuniteti i aktorëve ka shprehur shqetësim se inteligjenca artificiale mund të zëvendësojë aktorët e vërtetë. Aktoret Melissa Barrera, Kiersey Clemons dhe Natasha Lyonne kanë bërë thirrje për bojkotimin e agjencive që promovojnë Tilly Norwood.