Europol ka përditësuar listën e personave më të kërkuar dhe ka lansuar faqen e ridizajnuar të internetit “EU Most Wanted”. Një funksion i ri njoftimesh me e-mail lejon përdoruesit të regjistrohen dhe të marrin informacion sa herë që shtohen të arratisur të rinj.

Shtesa e fundit përfshin 18 persona të rrezikshëm, të akuzuar për vepra si trafikim njerëzor, trafikim droge dhe mashtrime në shkallë të gjerë. Arrestimi i tyre mbetet kyç për drejtësinë ndaj viktimave të tyre.

Që nga lansimi i faqes në 2016, 172 të arratisur janë arrestuar, nga të cilët 54 janë kapur direkt përmes sinjalizimeve të publikut. Europol thekson se angazhimi i qytetarëve është vendimtar për luftën kundër krimit ndërkufitar.
“Duke qëndruar të informuar, publiku mund të luajë një rol kyç në mbështetjen e zbatimit të ligjit,” deklaron Europol.