Aktorja Kate Winslet, 50 vjeçe, ka kritikuar publikisht njerëzit që bëjnë ndërhyrje plastike dhe përdorin ilaçe për humbje peshe për arsye estetike. Ajo tha se nuk e pëlqen fenomenin e “tweakments” dhe e konsideron të frikshme kur njerëzit përpiqen të arrijnë një version të përsosur të vetes.

“Është e frikshme. Mendoj: ‘Jo ti! Pse?’”, tha Winslet për The Times. Ajo fajëson rrjetet sociale për fenomenin, duke shtuar se njerëzit që përdorin ndërhyrje kozmetike “bëhen të obsesionuar pas një ideali përsosmërie për të marrë më shumë pëlqime në Instagram”.

Aktorja shtoi se nuk ka bërë asgjë në fytyrën e saj dhe se preferon të pranojë plakjen natyrale: “Gjërat më të bukura që kam parë janë tek gratë mbi 70 vjeç. Ajo që më shqetëson është se shumë gra të reja nuk kanë koncept se çfarë është bukuria e vërtetë.”

Winslet ka folur më parë për mënyrën si e pranon plakjen: “Jam mirë me të. Mendoj se dukem fantastike. Gratë në të 40-at janë të kushtëzuara të mendojnë se gjithçka po mbaron, por nuk është kështu. Është thjesht kushtëzim.”