Qeveria amerikane paralajmëron anulime masive fluturimesh në 40 aeroporte

Vendi | 07.11.2025 Ora 8:08

Administrata Federale e Aviacionit në SHBA ka njoftuar se do të reduktojë fluturimet në 40 aeroporte të mëdha në të gjithë vendin, si pasojë e mbylljes më të gjatë të qeverisë në historinë e vendit.

Sipas urdhrit emergjent të lëshuar nga FAA, ulja do të fillojë me 4% të fluturimeve nga e premtja dhe mund të arrijë deri në 10% javën e ardhshme, nëse situata nuk zgjidhet. Kjo mund të rezultojë në mijëra anulime në ditë.

Ndër aeroportet e prekura janë ato të Nju Jorkut, Çikagos, Los Anxhelosit dhe Dallasit. Kompanitë ajrore si Delta, United, American dhe Southwest tashmë kanë filluar të anulojnë fluturime për të shmangur bllokimet.

Ekspertët paralajmërojnë se mungesa e stafit në kontrollin ajror për shkak të mbylljes së qeverisë mund të ndikojë drejtpërdrejt në sigurinë e fluturimeve, ndërsa udhëtarëve u rekomandohet të kontrollojnë oraret dhe të bëjnë plane alternative nëse udhëtimet e tyre janë të domosdoshme.