Sot mbahet nata e dytë e Festivalit të Këngës në RTK

Vendi | 07.11.2025 Ora 7:53

Sot në orën 21:00 zhvillohet nata e dytë e edicionit të tretë të Festivalit të Këngës në Radiotelevizionin e Kosovës (RTK).

Nata e parë u hap me performancën “Këngë Moj” nga kompozitori Musa Piperku, në interpretim të korit Siparantum dhe me dirigjimin e Memli Kelmendit, duke krijuar një atmosferë të jashtëzakonshme në hapje të festivalit.

Në skenë u paraqitën 20 konkurrentë me zhanre të ndryshme, duke sjellë një mbrëmje të mbushur me energji, emocione dhe konkurrencë të fortë. Një moment i veçantë ishte homazhi për këngëtaren e ndjerë Violeta Rexhepagiqi, ndërsa nata u mbyll me interpretimin e përbashkët të këngës ikonike “Baresha”.

Edicioni i tretë i Festivalit të Këngës në RTK do të vazhdojë edhe sonte, ku priten surpriza dhe performanca të reja nga artistët pjesëmarrës.