Numri në rënie i fëmijëve në Britaninë e Madhe pritet të çojë në mbylljen e afërsisht 800 shkollave fillore deri në vitin 2029. Sipas një studimi të fundit nga Instituti për Politikat e Arsimit (EPI), kjo tendencë lidhet kryesisht me uljen e lindjeve në vend dhe me presionin financiar mbi shkollat.

Raporti tregon se shumë këshilla lokale tashmë po përballen me vështirësi për të mbajtur shërbimet arsimore. Një faktor tjetër që ndikon është edhe kostoja e lartë e strehimit, sidomos në Londër, ku një pjesë e madhe e familjeve po zhvendosen jashtë qytetit ose po zgjedhin shkolla private për fëmijët e tyre.

Regjistrimi në shkollat fillore shtetërore kishte arritur kulmin në vitin shkollor 2018-2019 me 4.5 milionë nxënës, por prej atëherë ka rënë me rreth 2%. Në pesë vitet e ardhshme pritet një ulje shtesë prej 4%, që përkthehet në humbjen e 162 mijë nxënësve – ekuivalenti i mbylljes së rreth 800 shkollave fillore në të gjithë vendin.