Platformat e mëdha të transmetimit si Netflix vazhdojnë të përditësojnë katalogët e tyre, duke shtuar vazhdimisht përmbajtje të reja për të tërhequr përdoruesit dhe duke hequr projekte që u lënë vend prodhimeve të reja.

Kjo ndodh pothuajse çdo muaj, kur disa tituj të rinj debutojnë dhe të tjerë largohen nga platforma.

Në Netflix, për shembull, pritet me entuziazëm premiera e sezonit të ri të “Squid Game” më 27 qershor.

Por ndërkohë, një tjetër serial shumë i ndjekur do të largohet. Bëhet fjalë për dramën ligjore “Suits”, e cila nuk do të jetë më e disponueshme në platformë pas datës 16 korrik 2025.

Ky serial, i cili u shfaq për herë të parë në vitin 2011 dhe përfundoi pas 9 sezoneve dhe 134 episodeve në shtator 2019, ka marrë nota të larta nga kritikët dhe publiku, duke arritur një vlerësim prej 8.4 në IMDb.

I krijuar nga Aaron Korsh për USA Network, “Suits” sjell historinë e Mike Ross (Patrick J. Adams), një i ri me një inteligjencë të jashtëzakonshme, i cili pa diplomë në juridik arrin të punojë pranë avokatit të njohur Harvey Specter (Gabriel Macht) në Manhattan.
Fansat kanë edhe pak javë kohë për të rikujtuar episodet e serialit para se ai të largohet nga katalogu i Netflix.