Studioja Warner Bros. ka shtyrë për më shumë se gjashtë muaj datën e publikimit të filmit Animal Friends, një komedi live-action e kombinuar me animacion. Projekti që pritej të dilte në kinema më 10 tetor 2025, tani do të shfaqet më 1 maj 2026.

Regjinë e filmit e bën Peter Atencio, i njohur për komeditë Keanu dhe The Machine, ndërsa skenarin e kanë shkruar Kevin Burrows dhe Matt Mider. Filmi sjell një kast të yjeve, përfshi: Ryan Reynolds, Jason Momoa, Aubrey Plaza, Addison Rae, Dan Levy, Lil Rel Howery dhe Ellie Bamber.

Projekti fillimisht ishte zhvilluar nga Sony Pictures, por më vonë kaloi në Warner Bros. përmes marrëveshjes me Legendary. Përveç Legendary, filmi prodhohet nga Maximum Effort dhe Prime Focus Studios.

Për fansat e kinemasë, kjo datë përkon me një tjetër titull të madh — The Devil Wears Prada 2 nga Disney, që po ashtu është planifikuar për 1 maj 2026, pasi Avengers: Doomsday u zhvendos më vonë gjatë atij viti.

Krahas këtij projekti, Ryan Reynolds është angazhuar edhe në filmin Mayday për Apple TV+, ndërsa Jason Momoa pritet të rikthehet në rolet e tij në The Wrecking Crew dhe dramën In the Hand of Dante.