Kinematë në mbarë botën janë pushtuar këtë fundjavë nga dy premiera të mëdha: Disney ka sjellë versionin live-action të “Lilo and Stitch”, ndërsa Tom Cruise është rikthyer me një tjetër mision të rrezikshëm në filmin e ri “Mission: Impossible – The Final Reckoning”.

Sipas Variety, “Lilo and Stitch” ka fituar 341 milionë dollarë në arkë në mbarë botën, duke tejkaluar pritshmëritë dhe duke vendosur një rekord të ri për fundjavën e Memorial Day në SHBA. Ky është çelja e dytë më e madhe e vitit pas “A Minecraft Movie”. Filmi, që sjell historinë e dashur të vitit 2002 në një version të ri me aktorë realë, ka marrë vlerësime të përziera nga kritika: Daily Beast e quan “një aventurë gazmore dhe e ëmbël”, ndërsa Times e cilëson si “një katastrofë të pakuptimtë”.

Nga ana tjetër, “Mission: Impossible – The Final Reckoning” ka arkëtuar 190 milionë dollarë në hyrje, një debutim i fuqishëm për këtë që thuhet të jetë pjesa e fundit e sagës. Tom Cruise, që luan agjentin Ethan Hunt që nga viti 1996, ka deklaruar për Hollywood Reporter se ky është vërtet finali: “Nuk e quajmë kot ‘final’!”. Megjithatë, ka dyshime nëse ky do të jetë vërtet filmi i fundit i serisë. Kritikat janë të ndara – The Guardian e quan një “aventurë të çmendur e argëtuese” me pesë yje, ndërsa Hollywood Reporter e përshkruan si një “largim zhgënjyes”.

Në çdo rast, të dy filmat kanë treguar se publiku i kinemasë është ende i etur për spektakël të madh në ekranin e madh.