Sam Neill, aktori legjendar i “Jurassic Park”, do të rikthehet në ekranin e madh, këtë herë në një betejë epike mes përbindshave gjigantë. Sipas The Hollywood Reporter, Neill është aktori më i ri që i bashkohet kastit të vazhdimit të filmit Godzilla x Kong, i cili do të vazhdojë historinë e “The New Empire” të vitit 2024.

Në këtë kapitull të ri të Monsterverse, Godzilla dhe Kong do të përballen me kërcënime të reja, pas bashkimit të tyre për të mposhtur armikun e nëndheshëm në filmin e kaluar. Filmi i ri do të shënojë gjithashtu një ndryshim të madh krijues, pasi regjinë do ta marrë Grant Sputore, duke zëvendësuar Adam Wingard.

Përveç Sam Neill, në këtë projekt janë konfirmuar edhe emra të njohur si Dan Stevens – që rikthehet nga filmi i kaluar – si dhe të rinjtë Kaitlyn Dever, Jack O'Connell, Matthew Modine, Delroy Lindo dhe Alycia Debnam-Carey. Roli i Neill ende nuk është bërë publik, por prania e tij pritet të sjellë një dozë nostalgjie për adhuruesit e aventurave me krijesa të jashtëzakonshme.