Aktori i njohur i Hollywood-it, Val Kilmer, i famshëm për rolet e tij në disa nga filmat më të mëdhenj të viteve '80 dhe '90, si Top Gun dhe Batman Forever, ka ndërruar jetë në moshën 65-vjeçare.

Kilmer luajti gjithashtu në filmin biografik The Doors (1991), duke portretizuar ikonën e rock-ut Jim Morrison, si dhe në western-in Tombstone dhe dramën kriminale Heat.

Sipas vajzës së tij, Mercedes, ai u nda nga jeta të martën në Los Anxhelos për shkak të pneumonisë. Kilmer ishte diagnostikuar me kancer në fyt në vitin 2014, por më vonë u shërua. Megjithatë, operacioni i trakeotomisë ndikoi në zërin e tij dhe kufizoi karrierën e tij të mëtejshme. Pavarësisht kësaj, ai u rikthye në ekran në vitin 2022 për të ripërsëritur rolin e tij si piloti Iceman në Top Gun: Maverick, përkrah Tom Cruise.

Në vitin 2021, Kilmer publikoi një dokumentar të titulluar Val, i cili tregonte ngritjet dhe uljet e jetës dhe karrierës së tij. Dokumentari përfshinte edhe pamje nga arkivat e tij personale 40-vjeçare, ku ai fliste me ndihmën e një pajisjeje zanore pas operacionit të kancerit.

Val Kilmer lindi më 31 dhjetor 1959 në Los Anxhelos dhe ishte i pari student 17-vjeçar që u pranua në Juilliard School, një nga akademitë më prestigjioze të artit dramatik në botë. Karrierën e nisi me komeditë Top Secret! (1984) dhe Real Genius (1985), përpara se të arrinte famën me rolin e tij si Iceman në Top Gun (1986).

Në vitin 1988, Kilmer u martua me aktoren britanike Joanne Whalley, me të cilën pati dy fëmijë.