"Adolescence" ndez debat për ndikimin e përmbajtjes toksike online

Film | 01.04.2025 Ora 8:19

Kryeministri britanik, Sir Keir Starmer, tha se seriali i Netflix Adolescence ishte "shumë i vështirë për t’u parë" me fëmijët e tij adoleshentë, teksa priti një takim në Downing Street për të diskutuar ndikimin e materialeve toksike në internet.

Drama, që trajton historinë e një 13-vjeçari të akuzuar për vrasje, ka nxitur një debat kombëtar mbi rolin e mediave sociale dhe influencuesve të "manosferës". Netflix ka vendosur ta transmetojë falas në shkollat e mesme në Mbretërinë e Bashkuar, duke e bërë atë pjesë të diskutimeve për edukimin mbi rreziqet e internetit.

Ndërsa disa kërkojnë ndalimin e smartfonëve në shkolla, Starmer theksoi se problemi kryesor nuk është prania e telefonave, por çfarë përmbajtjeje konsumojnë të rinjtë. Ai u shpreh i hapur për rishikimin e Online Safety Act për të forcuar mbrojtjen e fëmijëve nga materialet e dëmshme.