Një studim i ri sugjeron se ushqimi që konsumoni mund të ndikojë në aftësinë e trupit tuaj për të luftuar qelizat kanceroze në zorrën e trashë.

Problemi i mundshëm është përmbajtja e lartë e disa acideve yndyrore omega-6 – ndoshta nga ushqimet tepër të përpunuara – që mund të pengojnë vetitë kundër-inflamatore dhe kundër tumorale të omega-3, një acid yndyror thelbësor.

Sipas Dr. Timothy Yeatman, një prej autorëve kryesorë të studimit, omega-3 ka një rol të rëndësishëm në ndihmimin e sistemit imunitar për të luftuar mutacionet e përditshme në traktin gastrointestinal. Por, nëse trupi është i ekspozuar ndaj inflamacionit kronik nga omega-6, siç janë ato të gjetura në ushqimet e skuqura ose të përpunuara, mutacionet kanë më shumë mundësi të zhvillohen dhe trupi e ka më të vështirë të luftojë ato.

Omega-6 gjendet kryesisht në vajrat vegjetalë si ai i misrit, kikirikëve, sojës, lulediellit dhe safflower-it, të cilët përdoren gjerësisht në ushqimet e përpunuara. Nga ana tjetër, omega-3 mund të gjendet në sasi të larta tek peshqit yndyrorë si salmoni, sardelet dhe makrelat, si dhe në fara liri dhe arra.

Trendi shqetësues i kancerit kolorektal tek të rinjtë

Kanceri kolorektal, dikur i lidhur me moshat e vjetra, po shfaqet gjithnjë e më shpesh tek të rinjtë. Një studim i vitit 2017 tregoi se personat e lindur midis viteve 1981 dhe 1996 kanë dyfishin e rrezikut për kancer kolorektal krahasuar me ata të lindur në vitin 1950.

Faktorët që ndikojnë mund të jenë trashëgimia, obeziteti dhe ushqimi jo i shëndetshëm, si konsumimi i lartë i mishit të kuq, ushqimeve të përpunuara dhe mungesa e frutave dhe perimeve të freskëta.

Balancimi i omega-6 dhe omega-3

Studimi i fundit tregon se mungesa e omega-3 ndikon në paaftësinë e trupit për të zgjidhur inflamacionin e shkaktuar nga kanceri. Molekulat e prodhuara nga omega-3, si rezolvinat dhe lipoksinat, ndihmojnë që inflamacioni të përfundojë dhe të rivendoset gjendja normale në trup.

Por, tek mostrat e tumorit të marra nga pacientët, studiuesit vunë re se kishte një disbalancë të madhe midis omega-6 dhe omega-3, ku omega-6 dominonte dhe prodhonte molekula pro-inflamatore.

Si të rrisni omega-3 në dietën tuaj

Për të siguruar nivele të shëndetshme të omega-3, ekspertët rekomandojnë të konsumoni dy herë në javë rreth 85 gram peshk yndyror si salmoni ose sardelet. Alternativat përfshijnë edhe fara liri dhe chia, si dhe arra. Gjithashtu, suplementet e vajit të peshkut mund të jenë një mundësi, por konsultohuni me mjekun para se të filloni.