Këngëtarja 32-vjeçare me famë botërore, Rita Ora, ka reaguar pas perfomancës së saj të shtunën mbrëma në Festivalin e të Rinjve në Szeged, ku u paraqit me një flamur serb.

Nëpërmjet një deklarate për media, këngëtarja ka sqaruar se flamuri i është dhënë nga një adhurues, për të cilin nuk e ka ditur se cilit shtet i përket derisa ka dalë nga skena.

“Nuk e kam parë qartë se cilin shtet përfaqësonte flamuri. Sapo dola nga skena, kuptova se ishte flamur serb dhe jo hungarez”, thuhet në reagimin e saj.

Ajo më tej është shprehur krenare që është shqiptare e Kosovës dhe se nuk ka pasur qëllim mosrespektimin e vendit prej nga vjen.

“Përderisa i mbështes të gjithë fansat e mi nga të gjitha vendet dhe kulturat, dua të bëjë shumë të qartë se jam një shqiptare krenare e Kosovës dhe nuk e kisha për qëllim të mos respektoja trashëgimin time, ose të mërzisja popullin apo familjen time”, ka thënë ajo.

Gjesti i këngëtares ka ngjallur reagime të shumta në rrjete sociale.