Familjet në Britani të Madhe që përdorin naftë për ngrohje po përballen me rritje të ndjeshme të kostove, pas shtrenjtimit të këtij karburanti që nga fillimi i luftës me Iranin.

Sipas raportimeve të BBC-së, disa konsumatorë pritet të paguajnë pothuajse dyfishin e çmimit të vitit të kaluar për furnizimin me naftë për ngrohje.

Për të përballuar shpenzimet, disa familje po porosisin sasi më të vogla, ndërsa organizatat që ndihmojnë komunitetet rurale paralajmërojnë se për familjet me të ardhura të kufizuara, ngrohja po bëhet barrë gjithnjë e më e rëndë.

Qeveria britanike ka paralajmëruar masa për rregullimin e tregut, rritjen e konkurrencës dhe mbrojtjen e konsumatorëve. Megjithatë, ende nuk ka premtim për vendosjen e një kufiri të çmimit, të ngjashëm me atë që zbatohet për tarifat e gazit dhe energjisë elektrike.

Organizatat që përfaqësojnë komunitetet rurale kërkojnë masa të menjëhershme për uljen e kostove, përfshirë uljen e TVSH-së për naftën e ngrohjes dhe gazin e lëngshëm të naftës (LPG).

Sipas tyre, miliona familje që nuk kanë qasje në rrjetin e gazit janë veçanërisht të cenueshme, pasi nafta për ngrohje duhet të blihet në sasi të mëdha dhe me çmime që ndryshojnë vazhdimisht.