Qeveria britanike ka paralajmëruar një ligj të ri që do t’i detyrojë kompanitë teknologjike të parandalojnë fëmijët nga fotografimi, marrja dhe shpërndarja e imazheve nudo përmes telefonave dhe aplikacioneve.

Apple dhe Google kishin tre muaj kohë për të propozuar masa që do të bllokonin aksesin e të miturve në përmbajtje nudo, por qeveria britanike thotë se masat e propozuara deri tani nuk janë të mjaftueshme.

Ministrja e Kulturës, Lisa Nandy, tha se qeveria do të nisë punën për legjislacionin sa më shpejt. Rregullat do të kërkonin që mbrojtja të zbatohej jo vetëm në sistemet operative të telefonave, por edhe në aplikacionet që përdoren nga fëmijët.

Qëllimi është të parandalohet shfrytëzimi seksual i fëmijëve online, përfshirë rastet e mashtrimit dhe shantazhit seksual, ku të miturit joshen të dërgojnë fotografi intime dhe më pas kërcënohen me publikimin e tyre.

Apple dhe Google kanë deklaruar se tashmë kanë ndërmarrë hapa për sigurinë e fëmijëve, por qeveria britanike kërkon masa më të fuqishme.

Ndërkohë, organizatat për të drejtat digjitale kanë ngritur shqetësime për privatësinë, pasi zbatimi i këtyre masave mund të kërkojë verifikimin e moshës së përdoruesve dhe kontrollin e përmbajtjeve private. Qeveria britanike ka mohuar se kjo do të shndërrohet në një formë survejimi.