Australia ka ndaluar përfshirjen në listat zyrtare muzikore të këngëve që janë krijuar kryesisht ose tërësisht me inteligjencë artificiale.

Sipas rregullave të reja të Shoqatës Australiane të Industrisë së Regjistrimeve (ARIA), nga kjo javë këngët duhet të jenë “kryesisht të krijuara nga njerëzit” për të qenë të pranueshme në listat muzikore.

Përdorimi i AI-së nuk është ndaluar plotësisht. Artistët mund ta përdorin atë për procese si masterizimi, autotune apo instrumente elektronike, por kënga duhet të jetë shkruar nga njerëzit dhe vokali kryesor dhe instrumentet kryesore duhet të interpretohen nga njerëz.

Vendimi vjen pas polemikave rreth një versioni të këngës “Like a Prayer” të Madonna-s, të realizuar nga DJ australian Josh Fawaz. Kënga kishte arritur në vendin e parë në listën dance të ARIA-s dhe në vendin e dytë në listën e përgjithshme, ndërsa më vonë u bë e ditur se ishte përdorur edhe AI.

ARIA tha se nuk dëshiron të promovojë suksesin e muzikës së krijuar nga AI kur mungon krijimtaria njerëzore. Artistët tashmë do të duhet të deklarojnë nëse kanë përdorur AI gjatë krijimit të këngëve.

Nëse më vonë konstatohet se një këngë është kryesisht e krijuar nga AI, ARIA mund të ndryshojë retroaktivisht pozicionin e saj në lista dhe, në raste të caktuara, të kërkojë edhe kthimin e çmimeve.