Viti 2026 nis me ide të reja për udhëtime dhe destinacione që premtojnë eksperienca unike. CNN Travel ka publikuar listën e saj me 20 vendet më të rekomanduara për t’u vizituar këtë vit, duke përfshirë destinacione në gjashtë kontinente.

Lista përfshin qytete me oferta të pasura kulturore, si Brukseli në Belgjikë dhe Oulu në Finlandë, si dhe destinacione për ata që kërkojnë aventura dhe natyrë të paprekur, përfshirë fjordet e Kilit dhe Luginën Orkhon në Mongoli. Disa vende, si Adelaide në Australi dhe Bahreini, pritet të përfitojnë nga linja të reja ajrore që e bëjnë udhëtimin më të lehtë.

Viti 2026 pritet të jetë i rëndësishëm edhe për transportin. Europa po rikthen trenat e natës dhe po zgjeron rrjetin e linjave të shpejta, ndërsa Lindja e Mesme po investon në hekurudha moderne që lidhin qytete dhe rajone të tëra.

Një tjetër risi është përdorimi i inteligjencës artificiale në planifikimin e udhëtimeve. CNN Travel ka testuar mjete si ChatGPT në disa qytete të mëdha për të parë sa efektive janë në krijimin e itinerareve praktike për udhëtarë të ndryshëm.

Me më shumë opsione, lidhje më të mira dhe teknologji në ndihmë, 2026 shihet si një vit ideal për të eksploruar botën ndryshe.