Tarifat e gjera të vendosura nga presidenti amerikan Donald Trump nuk sollën rritje të ndjeshme të çmimeve gjatë vitit 2025, por ekspertët paralajmërojnë se ndikimi i tyre mund të ndihet më fort gjatë vitit 2026.

Sipas të dhënave zyrtare, të ardhurat nga tarifat u rritën me 187 miliardë dollarë në vitin 2025, gati trefish më shumë krahasuar me një vit më parë. Rreth 80% e kësaj barre u përballua nga bizneset, të cilat fillimisht u përpoqën të mos i kalonin kostot te konsumatorët. Megjithatë, kjo strategji po arrin kufijtë e saj.

Analistët vlerësojnë se gjatë këtij viti bizneset do të fillojnë gradualisht t’i reflektojnë tarifat në çmimet e produkteve, veçanërisht në sektorë me marzhe të ulëta fitimi si ushqimi. Sipas parashikimeve, inflacioni mund të rritet edhe më tej në muajt e parë të vitit 2026.

Situata krijon një sfidë politike për administratën Trump, e cila përballet me presion në rritje për të lehtësuar barrën e kostos së jetesës për qytetarët. Në këtë kontekst, Shtëpia e Bardhë ka shtyrë ose zbutur disa tarifa, përfshirë ato për produkte ushqimore, mobilie dhe materiale ndërtimi.

Një faktor kyç mbetet edhe vendimi i pritshëm i Gjykatës Supreme, e cila mund të kufizojë ose rrëzojë disa nga tarifat më të gjera. Vendimi pritet të ketë ndikim të drejtpërdrejtë në strategjitë e çmimeve të bizneseve dhe në koston finale për konsumatorët amerikanë.