Frika se inteligjenca artificiale do të zëvendësojë masivisht punëtorët ende nuk po reflektohet në tregun e punës. Një analizë e publikuar nga Vanguard tregon se profesionet më të ekspozuara ndaj automatizimit nga AI po shënojnë rritje më të shpejtë të punësimit krahasuar me periudhën para pandemisë.

Sipas të dhënave, nga mesi i vitit 2023 deri në mesin e vitit 2025, punësimi në këto profesione është rritur për 1.7%, ndërsa para Covid-19 rritja ishte rreth 1%. Ndërkohë, rritja e punësimit në profesionet e tjera ka shënuar ngadalësim.

Pozitive janë edhe të dhënat për pagat. Profesionet e ekspozuara ndaj AI kanë përjetuar rritje reale të pagave prej 3.8% në periudhën pas pandemisë, krahasuar me vetëm 0.1% para saj.

Ekspertët theksojnë se, ndonëse AI po ndryshon mënyrën e funksionimit të punëve dhe mund të ndikojë në disa pozita, nuk ka ende prova për dëme të gjera në punësim. Kufizimet aktuale të teknologjisë dhe nevoja për mbikëqyrje njerëzore mbeten faktorë kyç.