Gripi ka goditur më herët këtë dimër në Britani, ndërsa ekspertët po paralajmërojnë një sezon më agresiv për shkak të variantit të ri H3N2 “subclade K”. Përhapja e kufizuar e këtij virusi në vitet e fundit ka ulur imunitetin në komunitet, duke çuar në rritje të shpejtë të rasteve.

Sipas NHS England, në fillim të dhjetorit u regjistruan mesatarisht 2,660 pacientë në ditë të shtruar me grip – një rritje prej 55% brenda javës. Numrat vazhdojnë të rriten, pa shenja se vala po bie. Situata është serioze edhe në Skoci, Uells dhe Irlandën e Veriut.

NHS ka lëshuar një thirrje urgjente për vaksinim për grupet e rrezikuara: personat mbi 65 vjeç, pacientët me sëmundje kronike, gratë shtatzënë, banorët e shtëpive të kujdesit dhe kujdestarët. Vaksina për fëmijë ofrohet përmes spray-t nazal, ndërsa qytetarët jashtë kategorive të rrezikut mund ta blejnë vaksinën privatisht.

Autoritetet thonë se nuk ka mungesë të vaksinave për grupet prioritare, megjithëse barnatoret private mund të kenë sasi të kufizuar. Vaksina ofron mbrojtje për gjithë sezonin dhe zakonisht kërkon deri në 14 ditë për të qenë plotësisht efektive.

Ekspertët theksojnë se masa të thjeshta si higjiena e duarve, ventilimi i hapësirave të mbyllura dhe përdorimi i maskës nëse jeni të sëmurë mbeten mënyrat më të mira për të frenuar përhapjen.