HBO ka njoftuar se sezoni i tretë i serialit të shumëpritur Euphoria do të publikohet në prill 2026, më shumë se katër vite pas përfundimit të sezonit të dytë në shkurt 2022. Datë e saktë ende nuk është zbuluar.

Sezoni i ri me tetë episode do të rikthejë Zendaya-n në rolin e Rue Bennett, së bashku me Sydney Sweeney, Jacob Elordi, Hunter Schafer, Eric Dane, Alexa Demie dhe Maude Apatow. Disa aktorë si Martha Kelly dhe Chloe Cherry kalojnë në role të rregullta, ndërsa kast-it i bashkohen edhe emra të rinj.

Barbie Ferreira nuk do të rikthehet, ndërsa aktori Angus Cloud ka ndërruar jetë në vitin 2023. Storm Reid gjithashtu nuk është pjesë e sezonit të ri. Seriali vazhdon të mbetet nën krijimtarinë e Sam Levinson, në bashkëprodhim me A24.