Një pensioniste zvicerane ka rënë viktimë e një mashtrimi romantik, pasi besoi se ishte në një lidhje me aktorin hollivudian Brad Pitt. Gruaja, e prezantuar si Patricia, pagoi pothuajse 100 mijë dollarë mashtruesit dhe madje udhëtoi në SHBA, ku kaloi tre javë në një dhomë hoteli duke pritur takimin që nuk ndodhi kurrë.

Historia filloi në maj 2024 kur ajo mori një mesazh në Instagram nga dikush që pretendonte se ishte menaxheri i Pitt-it. Mashtruesi vazhdoi komunikimin duke simuluar një marrëdhënie emocionale dhe i kërkoi asaj pagesa të mëdha me pretekstin se takimi me aktorin kishte një “tarifë menaxhimi”.

Në total, ajo i dërgoi rreth 100 mijë dollarë në disa transferta, përfshirë para të kërkuara për “shpenzime mjekësore”. E bindur se do ta takonte aktorin, ajo udhëtoi në Los Angeles, por përfundoi duke pritur e vetme në hotel.

Vetëm pas kthimit në Zvicër, kur lexoi një rast të ngjashëm të mashtrimit, ajo kuptoi se edhe vetë ishte mashtruar. Rasti është raportuar në polici, ndërsa gruaja shprehet se përjetoi “turp dhe zhgënjim të thellë” pas pothuajse një viti komunikimi me një person që nuk ekzistonte.