Presidenti Donald Trump nënshkroi të mërkurën paketën e financimit që rikthen funksionimin e qeverisë federale, duke i dhënë fund mbylljes më të gjatë në historinë amerikane.

Dhoma e Përfaqësuesve kishte miratuar më parë marrëveshjen mes republikanëve dhe demokratëve centristë, e cila garanton funksionimin e qeverisë deri në janar dhe mbështet disa agjenci kyçe për pjesën tjetër të vitit fiskal 2026.

Marrëveshja vjen pas një bllokade 43-ditore, e cila kishte shkaktuar pushime masive dhe ndërprerje të shërbimeve federale. Ajo parashikon rivendosjen e pagave për punonjësit federalë dhe rifillimin e shërbimeve kritike ushqimore dhe të mbështetjes sociale për miliona amerikanë.

Trump e përshkroi nënshkrimin si një fitore ndaj demokratëve, duke akuzuar “ekstremistët” për shantazh. Shumë demokratë protestuan, duke paralajmëruar se mungesa e zgjidhjes mund të rrisë kostot e sigurimeve shëndetësore për qytetarët.

Pas mbylljes së qeverisë, Kongresi ka përpara sfida të tjera të rëndësishme, përfshirë një votim të hershëm për kreditet e Obamacare, buxhetin e bujqësisë dhe çështjet e energjisë, si dhe debatet mbi dosjet e Jeffrey Epstein.