Robert Pattinson kthehet si Dark Knight - The Batman 2 nis xhirimet në 2026

Film | 15.09.2025 Ora 8:16

Fansat e DC-së kanë arsye të gëzohen: regjisori Matt Reeves ka zbuluar detaje të reja për filmin The Batman 2. Në një intervistë për Variety, ai konfirmoi se xhirimet do të nisin në pranverën e vitit 2026, ndërsa filmi pritet të dalë në kinema në vitin 2027.

Reeves u shpreh se është shumë krenar për skenarin që ka shkruar bashkë me Mattson Tomlin dhe se Robert Pattinson, i cili rikthehet në rolin e Bruce Wayne/Batman, është jashtëzakonisht i entuziazmuar pas leximit të historisë. Për të ruajtur sekretin, skenari është dërguar me masa të rrepta sigurie, madje me një çantë të veçantë me kod.

Pas suksesit të filmit të parë në vitin 2022 dhe serialit The Penguin, pritjet për vazhdimin janë të mëdha. Ende nuk dihet cili do të jetë antagonisti kryesor, por me planet për të ngritur edhe më lart nivelin e historisë, publiku pret surpriza të mëdha.