UEFA përjashton një klub për 10 vjet nga garat evropiane për trukim ndeshjesh: Dy lojtarë përjashtohen nga futbolli përgjithmonë

Sport | 16.07.2025 Ora 17:15

UEFA ka përjashtuar klubin malazez FK Arsenal Tivat nga të gjitha garat evropiane për një periudhë prej dhjetë vitesh dhe e ka gjobitur me 500 mijë euro, pas akuzave për manipulim të ndeshjes kundër Alashkert FC në korrik 2023.

Hetimi i Organit të Kontrollit, Etikës dhe Disiplinës të UEFA-s zbuloi shkelje të rënda të integritetit dhe rregullave disiplinore, përfshirë manipulimin e rezultatit.

Përveç klubit, disa individë janë ndëshkuar rëndë: lojtari Nikola Celebic dhe drejtori sportiv Ranko Krgovic janë përjashtuar përjetësisht nga çdo aktivitet futbolli, ndërsa tre persona të tjerë janë pezulluar për dhjetë vjet. UEFA i ka kërkuar FIFA-s që ta zgjerojë këtë ndalim edhe në nivel global, duke e bërë këtë një nga dënimet më të ashpra në historinë moderne të futbollit evropian.