Bill Gates, bashkëthemeluesi i Microsoft-it, ka shpallur synimin për të dhuruar 99% të pasurisë së tij gjatë dy dekadave të ardhshme, duke e përfunduar punën e Fondacionit Gates në vitin 2045.

Në një postim në blog, Gates deklaroi: “Njerëzit do të thonë shumë gjëra për mua kur të vdes, por jam i vendosur që të mos jetë ‘ai vdiq i pasur’ njëra prej tyre.” Ai tha se Fondacioni Gates ka dhuruar tashmë mbi 100 miliardë dollarë për projekte të shëndetit dhe zhvillimit, dhe se planifikon të shpërndajë edhe 200 miliardë të tjerë, në varësi të luhatjeve të tregjeve dhe inflacionit.

Ky plan përshpejton ndjeshëm dhurimin, pasi më herët ai dhe ish-bashkëshortja e tij Melinda kishin planifikuar që fondacioni të funksiononte edhe shumë kohë pas vdekjes së tyre. Gates tha se është frymëzuar nga eseja “Ungjilli i Pasurisë” e Andrew Carnegie, e vitit 1889, ku thuhet: “Njeriu që vdes i pasur, vdes i turpëruar.”

Pavarësisht kësaj, Gates do të mbetet miliarder. Pasuria e tij aktuale është rreth 108 miliardë dollarë, sipas Bloomberg, duke e renditur atë të pestin në listën e më të pasurve në botë.

Fondacioni Gates synon t’i përqendrojë përpjekjet në tri fusha: eliminimin e sëmundjeve të parandalueshme që marrin jetën e nënave dhe fëmijëve, zhdukjen e sëmundjeve infektive si malaria dhe fruthi, si dhe reduktimin e varfërisë ekstreme.

Në intervistat e tij të fundit, Gates kritikoi prerjet në ndihmat e huaja nga SHBA, Britania dhe Franca. Ai përmendi edhe ndikimin negativ të vendimeve të Elon Musk për të ulur financimet për disa programe jetike shëndetësore, veçanërisht në Afrikë. “Këto prerje nuk do të vrasin vetëm fëmijë – por miliona fëmijë,” u shpreh Gates.

Fondacioni Gates është gjithashtu një donator i BBC Media Action, krahu bamirës i BBC-së, i ndarë nga aktivitetet e saj të lajmeve.