Zyrtarët kinezë i kanë kërkuar Presidentit të SHBA, Donald Trump, që të “anulojë plotësisht” tarifat e reja të ashtuquajtura “reciproke”, pasi lufta tregtare mes dy ekonomive më të mëdha të botës vazhdon të thellohet.

Këtë javë, Trump njoftoi një pauzë 90-ditore për disa tarifa globale, por ndërkohë rriti në 145% tarifat për importet nga Kina. Kina reagoi duke rritur tarifat ndaj produkteve amerikane në 125%.

Administrata amerikane paralajmëroi përjashtime të përkohshme për disa pajisje elektronike, por zyrtarët kanë lënë të kuptohet se mund të ketë tarifa të reja për gjysmëpërçuesit dhe zinxhirin e furnizimit elektronik, në emër të sigurisë kombëtare.

Këto zhvillime kanë krijuar pasiguri të reja në tregjet ndërkombëtare, ndërsa përpjekjet për dialog mes dy palëve mbeten të pezulluara. Shtëpia e Bardhë thekson se tarifat janë pjesë e një strategjie për të arritur kushte më të favorshme tregtare dhe për të rikthyer punësimin në SHBA, por kritikat për ndikimin në tregtinë globale po shtohen.