Kryesia e Bashkësisë Islame të Kosovës (BIK) ka njoftuar se muaji i madhëruar i Ramazanit përfundon ditën e shtunë, më 29 mars, ndërsa e diela shënon ditën e parë të Fitër Bajramit.

“Manifestimi qendror për këtë festë do të mbahet në Xhaminë e Madhe në Prishtinë, duke filluar në orën 05:41 me faljen e namazit të sabahut, të cilit do t'i prijë Hetem ef. Sopjani. Pas tij, do të mbahet një ligjëratë tematike kushtuar kësaj dite nga Agim ef. Hyseni, anëtar i kryesisë së BIK-ut. Namazi i Fitër Bajramit do të falet në orën 06:59, me prijës Vedat ef. Sahitin, kryeimamin e Bashkësisë Islame të Kosovës. Më pas, myftiu i Kosovës, Naim ef. Tërnava, do të mbajë hytben dhe do t'u drejtohet besimtarëve me një mesazh të veçantë për këtë festë”, thuhet në njoftimin e BIK-ut.

Po ashtu, bëhet e ditur se si çdo vit, Kryesia e Bashkësisë Islame të Kosovës do të organizojë një pritje tradicionale përurimi në selinë e saj, nga ora 09:00 deri në orën 12:00.

BIK-u ka uruar të gjithë besimtarët dhe opinionin e gjerë për këtë ditë të shenjtë, duke lutur Zotin që të ketë pranuar agjërimin, lutjet dhe ibadetet e tyre.