Agjencia e lajmeve, “Associated Press”, ka bërë të ditur planet për shkurtimin e stafit prej 8 për qind në kuadër të një plani për përshtatje me kushtet me ndryshim të shpejtë në industrinë mediatike, shkruan “The New York Times”.
 
Organizata informative e lajmeve ka njoftuar se shkurtimet janë pjesë e një plani për të përmbushur “nevojat evoluese të konsumatorëve tanë”. Shkurtimet do të prekin edhe pjesën e deskut informativ, edhe punëtorët e sektorit biznesor.
 “Kjo ka të bëjë me sigurimin e rolit të rëndësishëm të AP-së si organizata e vetme përnjëmend e pavarur informative në përmasa të gjera gjatë një periudhe transformimi në industrinë e mediave”, ka bërë të ditur AP-ja.
 
Në një njoftim për punëtorët, AP News Guild shkroi se shkurtimet do të jenë rezultat i rënies së të ardhurave dhe do të ndikonin në zyrat globale të organizatës dhe stafin administrativ. Njoftimi spikat se deri në 121 punonjës do të prekeshin.