Kompania “Meta” njoftoi se ndaloi mediat shtetërorë ruse të përdorin platformat e saj të mediave sociale, duke thënë se “ato përdorën taktika mashtruese për të përforcuar propagandën e Moskës”.

Kompania, e cila zotëron rrjetin: Facebook, WhatsApp dhe Instagram, njoftoi se vendimi do të hyjë në fuqi gjatë ditëve të ardhshme, në një përpjekjeve për të kundërshtuar “operacionet e fshehta të ndikimit në internet”të Rusisë.

“Pas shqyrtimit të kujdesshëm, ne zgjeruam masat kundër mediave shtetërore ruse: Rossiya Segodnya, RT dhe subjekte të tjera të lidhura me to tani janë të ndaluara nga aplikacionet tona globale”, njoftoi kompania “Meta” në një deklaratë.

Zëdhënësi i Kremlinit, Dmitry Peskov, e kritikoi vendimin duke thënë se “veprime të tilla selektive kundër mediave ruse janë të papranueshme” dhe se “Meta me këto veprime po diskretiton veten”.

RT njihej më parë si ‘Russia Today’. ‘Rossiya Segodnya’ është kompania mëmë e agjencisë shtetërore të lajmeve RIA Novosti dhe medias Sputnik.

Asnjëra nga këto media nuk iu përgjigj një kërkese për koment nga agjencia e lajmeve Associated Press

Vendimi i kompanisë “Meta” vjen disa ditë pasi Shtetet e Bashkuara njoftuan sanksione të reja ndaj RT-së, duke akuzuar median e Kremlinit se është një pjesë kyçe e “makinerisë së luftës së Rusisë dhe përpjekjeve të saj për të minuar demokracinë e kundërshtarëve të saj”.

Zyrtarët amerikanë njoftuan javën e kaluar se “RT” po punonte krah për krah me ushtrinë ruse dhe po zhvillonte fushata për mbledhjen e fondeve për të paguar për armët dhe pajisjet e tjera për ushtarët që luftonin në Ukrainë.

Po ashtu sipas zyrtarëve amerikane faqet e internetit të rrjetit “RT” janë përdorur për të përhapur dezinformata dhe propagandë në Evropë, Afrikë, Amerikën e Jugut dhe vende të tjera.

Në fillim të këtij muaji, administrata e Presidentit Biden bllokoi disa faqe interenti të Kremlinit dhe akuzoi dy punonjës të rrjetit RT se në mënyrë të fshehtë i kishin kaluar miliona dollarë një kompanie në shtetin Tenësi për të postuar në rrjetet sociale video që përhapin mesazhe pro-Kremlinit. Moska i ka mohuar akuzat.

Edhe më herët kompania “Meta” ka ndërmarrë disa hapa për të parandaluar propagandën ruse.

Që nga viti 2020, Meta i etiketon postimet dhe përmbajtjet nga mediat shtetërore ruse dhe në vitin 2022 filloi të bllokojë mediat shtetërore nga shfaqja e reklamave.

Moska është kundërpërgjigjur, duke e cilësuar kompaninë “Meta” si një grup ekstremist në mars të vitit 2022, menjëherë pas dërgimit të trupave në Ukrainë dhe bllokimit të Facebook-ut dhe Instagram-it.

Këto platforma, si dhe rrjeti social “X”, i njohur më parë si Twitter, përdoreshin gjerësisht nga banorët rusë, por që pas bllokimit nga Moska, pas agresionit në Ukrainë, mund të hapen vetëm përmes rrjeteve private virtuale. /VOA