Kim Kardashian ka marrë një dhuratë të veçantë për ditëlindjen e saj: gjerdanin ikonik me smeraldë dhe diamante të shtëpisë së bizhuterive Bvlgari, që dikur aktori Richard Burton ia dhuroi legjendës së Hollywood-it, Elizabeth Taylor. Bizhuteria iu prezantua Kim-it gjatë një vizite surprizë në selinë e markës në Romë, të organizuar nga stilisti i saj, Law Roach. Kardashian e ndau momentin me ndjekësit në Instagram, duke e cilësuar këtë si dhuratën më të mirë të ditëlindjes. Ajo tregoi se e kishte parë më parë koleksionin privat të Elizabeth Taylor, pas vdekjes së aktores në vitin 2011, kur ishte ftuar në shtëpinë e saj për të parë bizhuteritë dhe sendet personale. Gjerdani ka një histori të veçantë, pasi lidhet me marrëdhënien mes Taylor-it dhe Burton-it, një prej çifteve më të njohura në historinë e kinemasë.