Një studim i ri ka gjetur se vdekjet në aksidentet trafiku në SHBA rriten me rreth 15% në ditët kur publikohen albume të reja nga artistë të njohur.

Studimi, i publikuar në revistën JAMA Network Open, u realizua nga studiues nga Mass General Brigham dhe Harvard Medical School. Ata analizuan të dhënat e aksidenteve fatale dhe publikimet e albumeve më të dëgjuara në Spotify nga viti 2017 deri në 2022.

Në ditët e zakonshme, mesatarisht janë regjistruar 121 viktima nga aksidentet trafiku, ndërsa në ditët e publikimit të albumeve numri ka qenë rreth 139 viktima.

Studiuesit dyshojnë se një nga arsyet mund të jetë rritja e përdorimit të telefonit. Kur publikohet një album i shumëpritur, shoferët mund të përdorin telefonin për ta kërkuar, transmetuar ose vendosur në listën e këngëve.

Megjithatë, studimi nuk dëshmon drejtpërdrejt se shoferët po përdornin telefonin në momentin e aksidentit dhe studiuesit pranojnë se mund të ketë edhe faktorë të tjerë.

Ekspertët theksojnë se nuk është muzika ajo që paraqet rrezikun kryesor, por ndërveprimi me telefonin apo sistemin multimedial gjatë vozitjes.

Rekomandimi është i thjeshtë: zgjidhni muzikën para se të niseni dhe gjatë vozitjes fokusohuni në rrugë.