Teksa Kina investon miliarda dollarë në zhvillimin e robotëve humanoidë dhe i konsideron ata një shtyllë të rëndësishme të ekonomisë së së ardhmes, ekspertët thonë se teknologjia është ende larg asaj që paraqitet në videot virale dhe fushatat promovuese.

Lojërat Botërore të Robotëve Humanoidë, që do të mbahen muajin e ardhshëm në Pekin, pritet të jenë një provë e qartë e hendekut mes reklamimit dhe aftësive reale të këtyre makinerive.

Edicioni i parë i turneut, i zhvilluar vitin e kaluar me pjesëmarrjen e rreth 500 robotëve nga 16 vende, u karakterizua nga lëvizje të ngadalta dhe përplasje të shpeshta mes robotëve gjatë garave sportive. Megjithëse organizatorët presin përmirësime këtë vit, një zyrtar kinez deklaroi se aftësitë e robotëve në ndeshjet e futbollit kanë avancuar vetëm "nga niveli i parashkollorëve në atë të adoleshentëve".

Pamjet virale të robotëve që vallëzojnë, vrapojnë maratona apo kryejnë punë shtëpie kanë krijuar përshtypjen se Kina është shumë pranë prodhimit të robotëve inteligjentë të aftë për të zëvendësuar njerëzit në jetën e përditshme. Megjithatë, ekspertët vlerësojnë se kjo është ende larg realitetit.

Interesi për industrinë u rrit ndjeshëm pasi presidenti kinez Xi Jinping vendosi në qendër të vëmendjes drejtuesin e kompanisë Unitree Robotics, Wang Xingxing, gjatë një samiti me liderët më të rëndësishëm të teknologjisë në vend.

Robotika është përfshirë si një nga prioritetet kryesore në planin pesëvjeçar të zhvillimit ekonomik të Kinës deri në vitin 2030. Pekini synon që robotët humanoidë të ndihmojnë në përballimin e plakjes së popullsisë dhe mungesës së fuqisë punëtore, duke u përdorur fillimisht në industri e më pas në fusha si arsimi, shëndetësia dhe shërbimet.

Sipas raportimeve të Reuters, autoritetet kineze kanë ndarë të paktën 20 miliardë dollarë që nga viti 2024 për të mbështetur zhvillimin e kësaj industrie. Megjithatë, pavarësisht investimeve të mëdha dhe entuziazmit, ekspertët theksojnë se robotët humanoidë kanë ende një rrugë të gjatë për të bërë përpara se të bëhen pjesë e zakonshme e jetës së përditshme.