Shqipëria po përgatitet të vendosë për herë të parë një kuadër të plotë ligjor për Inteligjencën Artificiale (IA), duke iu afruar standardeve të Bashkimit Europian.

Projektligji i iniciuar nga AKSHI synon të rregullojë zhvillimin, përdorimin dhe tregtimin e sistemeve të Inteligjencës Artificiale. Sipas draftit, bizneset do të kenë detyrime të reja për transparencë, dokumentim dhe kontroll të rreziqeve.

Sistemet e IA-së do të klasifikohen sipas nivelit të rrezikut, ndërsa për teknologjitë me rrezik të lartë do të kërkohet mbikëqyrje njerëzore, cilësi e të dhënave dhe monitorim i vazhdueshëm.

Projektligji parashikon edhe gjoba të larta për shkelësit, të cilat mund të arrijnë deri në 150 milionë lekë ose 7% të xhiros vjetore të kompanive, varësisht nga rasti.

Nëse miratohet, ky do të jetë ligji i parë gjithëpërfshirës për Inteligjencën Artificiale në Shqipëri, me synim përdorimin më të sigurt dhe transparent të teknologjisë.