Autoritetet shëndetësore në Francë kanë konfirmuar rastin e parë të hantavirusit në vend, të lidhur me shpërthimin që është raportuar në anijen turistike MV Hondius.

Sipas Ministrisë së Shëndetësisë së Francës, një shtetase franceze e evakuuar nga anija ka rezultuar pozitive pas kthimit në Paris, ndërsa gjendja e saj është përkeqësuar gjatë natës.

Autoritetet kanë vendosur në karantinë të rreptë pesë persona dhe po monitorojnë 22 kontakte të identifikuara në territorin francez.

Rasti i konfirmuar i përket virusit Andes, një lloj i rrallë i hantavirusit që mund të transmetohet nga njeriu te njeriu, duke e bërë këtë shpërthim më shqetësues se rastet e zakonshme.

Sipas Organizatës Botërore të Shëndetësisë, rreziku global mbetet i ulët, por situata po monitorohet pasi janë raportuar raste edhe në vende të tjera, përfshirë SHBA-në, ku janë regjistruar edhe viktima.