Rikthimi i James Bond në kinematë botërore do të vonohet më shumë se zakonisht, me filmin e ri që pritet të dalë vetëm në vitin 2028. Ky afat shënon një rekord të ri për serinë, duke u bërë ndërprerja më e gjatë në historinë e saj mbi gjashtë dekada.

Që nga publikimi i No Time to Die në vitin 2021, saga ka mbetur në pauzë, ndërsa largimi i Daniel Craig nga roli ka lënë të hapur një nga pyetjet më të mëdha: kush do të jetë Bond-i i ri?

Edhe pse ende nuk ka një emër zyrtar, pritet që diferenca mes dy filmave të arrijë deri në shtatë vite, një periudhë e pazakontë për këtë franchise të suksesshme.

Filmi i ardhshëm do të drejtohet nga Denis Villeneuve, i cili fitoi vlerësime të shumta me Dune, ndërsa skenari po përgatitet nga Steven Knight. Sipas burimeve, producentët po marrin kohën e nevojshme për të garantuar një rikthim të denjë për figurën legjendare të spiunazhit.

Në prapaskenë, vazhdojnë spekulimet për aktorin që do të marrë rolin ikonik. Mes kandidatëve më të përfolur janë Callum Turner, Harris Dickinson, Jacob Elordi, Aaron Taylor-Johnson dhe Theo James.