Një studim i ri shkencor sugjeron se Marsi mund të ketë pasur dikur një oqean gjigant që mbulonte deri në një të tretën e sipërfaqes së tij, përpara se të zhdukej miliarda vite më parë.

Studiuesit kanë identifikuar një formacion të mundshëm gjeologjik, të cilin e përshkruajnë si “shelf bregdetar”, që mund të përfaqësojë gjurmët e një vije të lashtë bregdetare – e ngjashme me mbetjet që lë uji në një vaskë pasi të zbrazet.

Hulumtimi është bazuar në të dhëna nga satelitët e NASA-s dhe simulime kompjuterike që krahasojnë proceset gjeologjike në Tokë me ato të Marsit.

Megjithëse ka prova të forta që Marsi ka pasur ujë në formë lumenjsh dhe liqenesh, ekzistenca e një oqeani të madh mbetet ende temë debati mes shkencëtarëve.

Sipas studiuesve, konfirmimi i kësaj teorie do të ndihmonte në kuptimin më të thellë të klimës së hershme të planetit dhe potencialit të tij për të mbështetur jetë në të kaluarën.