Kompani amerikane si OpenAI, krijuese e ChatGPT, aktualisht udhëheqin në zhvillimin e modeleve të mëdha gjuhësore (LLM), të njohura si “truri” i AI-së. Ndërkohë, gjiganti Nvidia dominon në prodhimin e çipave të avancuar që fuqizojnë këto sisteme.

Në anën tjetër, Kina ka avantazh të dukshëm në robotikë dhe prodhimin industrial, duke qenë lider global në zhvillimin dhe eksportin e robotëve, përfshirë ata humanoidë.

Gara u intensifikua më tej me lançimin e DeepSeek në vitin 2025, një model kinez i inteligjencës artificiale që ofron performancë të ngjashme me rivalët amerikanë, por me kosto dukshëm më të ulët.

Ekspertët theksojnë se përparësia nuk do të përcaktohet vetëm nga teknologjia më e avancuar, por nga mënyra se si AI integrohet në ekonomi dhe përdoret në shkallë të gjerë.

Në këtë kontekst, gara për AI po shihet si një nga betejat më të rëndësishme teknologjike dhe strategjike të kohës moderne.