Filmi i gjashtë i ekskluzivitetit komik horror Scary Movie do të dalë në kinema më 5 qershor 2026, një javë më herët nga sa ishte planifikuar fillimisht. Lajmi u konfirmua nga aktori dhe bashkëskenaristi Marlon Wayans përmes një njoftimi në rrjetet sociale.

Filmi shënon rikthimin e familjes Wayans në këtë seri për herë të parë që nga Scary Movie 2, ndërsa ribashkon në ekran edhe Anna Faris dhe Regina Hall. Projekti drejtohet nga Michael Tiddes dhe përfshin një sërë aktorësh të rikthyer dhe emra të rinj.

Sipas trailerit zyrtar, filmi do të parodizojë disa nga prodhimet më të njohura horror dhe thriller të viteve të fundit, duke vazhduar traditën e tij të talljes me klishetë e zhanrit dhe me ekskluzivitete të njohura si Scream.

Vendimi për ta avancuar premierën vjen mes një sezoni veror me konkurrencë të fortë në box office, por producentët synojnë ta nisin sezonin me një sukses komik.